Transforma TIC

Nesta contorna, 2014.gal Axenda Dixital de Galicia definiu unha liña de impulso ao sector da economía do coñecemento co obxectivo de convertelo nun sector que sexa capaz de dar soporte á competitividade de Galicia e que se consolide coma un sector de peso na economía galega.

2014.gal persegue a consecución duns obxectivos, a través desta liña:

• Consolidar un hipersector TIC competitivo, innovador e xerador de emprego cualificado, que se converta en sector estratéxico para a economía galega.
• Que ese sector sexa cohesionado e integrador. Que actúe tamén como motor do resto de sectores estratéxicos de Galicia.
• A creación dunha clase emprendedora e creativa estimulada por ese hipersector TIC. Búsqueda da excelencia tecnolóxica.

Para acadar estes obxectivos é necesaria a execución de políticas encamiñadas a favorecer un mellor posicionamento do sector da economía do coñecemento.

Para conseguilo, 2014.gal Axenda Dixital de Galicia aposta pola capacitación e a especialización de capital humano. As expectativas de crecemento do sector fan prever a necesidade de crear novos empregos de alta cualificación; estas fan prever que para 2014 se crearán 12.000 empregos. Isto supón pasar do 1.6% ao 2.5% da poboación ocupada galega. Para dar resposta a estas realidades procederase a incrementar a capacitación do capital humano, a atraer persoal cualificado ao sector e fomentar a retención de coñecemento nas empresas.

Cómpre impulsar de xeito decidido a creación e consolidación de empresas de base tecnolóxica, debido ao cambio de modelo produtivo que está a acontecer. É moi importante converter Galicia nunha terra de emprendedores e esquecer o medo ao fracaso tan presente na nosa comunidade.

Na mesma liña, tamén é necesario facer de Galicia una fonte de coñecemento tecnolóxico “dende as Universidades cara aos sectores estratéxicos da rexión”.

A especialización das empresas en segmentos altamente innovadores é un importante reto a cumprir, xunto co desenvolvemento dos mercados nos que actúan. Para acadar isto debemos apostar por un marco de cooperación entre as empresas tractores e as altamente especializadas: cooperar para competir.

Para fortalecer o sector TIC galego, 2014.gal tamén debe apostar por consolidar estruturas eficientes de apoio á innovación. Tamén debe centrarse en mellorar os servizos de apoio e de financiamento existentes para as empresas.

Neste mesmo ámbito, a Xunta pretende promover un Sistema de Compra Pública de Tecnoloxía Innovadora (CPTi) como vía para colocar á administración na vangarda tecnolóxica á vez que impulsa a innovación dentro do sector TIC con novos produtos e servizos que contribúan a súa internacionalización.

Por último, a Axenda Dixital de Galicia impulsará o aliñamento da demanda do tecido empresarial galego coa oferta do sector TIC. Para isto será preciso lograr una oferta ampla e cualificada de servizos profesionais, produtos e servizo avanzados, por parte do sector TIC, que se adecúa as necesidades reais e futuras dos sectores estratéxicos.

En resumo, é preciso o aliñamento de todos os axentes do ecosistema TIC: capital humano cualificados tecnolóxicamente, investigación orientada as necesidades de tecnoloxías presentes e futuras para o mercado, a administración como incentivadora destas tecnoloxías; e o sector tecnolóxico como o catalizador de todas esas tecnoloxías para exercer de tractor para o resto de sectores estratéxicos da economía galega.

Desta forma o sector TIC actuará como motor dos sectores estratéxicos de Galicia.