FLOSS

Alcance e obxectivos

O marco estratéxico tecnolóxico da Xunta de Galicia, a Axenda Dixital 2014.gal establece unha serie de obxectivos estratéxicos a cuxa consecución contribúen as accións de promoción das tecnoloxías FLOSS:

• A modernización da Administración para facela máis eficiente e para achegala á sociedade, ofrecendo novos servizos e de maior valor engadido que melloren a calidade de vida da cidadanía.
• A competencia dixital da poboación como base esencial para un emprego de calidade, a cohesión social e a calidade de vida.
• O cambio profundo do modelo produtivo, coa panca do uso intensivo das TIC, para conseguir unha economía sustentable e innovadora
• A transformación e articulación dos axentes do hipersector TIC para convertelo en sector estratéxico de futuro e tractor do resto de sectores chave para Galicia.

Con estes obxectivos presentes, defínense unhas liñas estratéxicas de impulso ao FLOSS promovidas dende a Xunta de Galicia:

• Impulsar unha oferta de solucións baseada en FLOSS de calidade
• Promover a implantación efectiva dos estándares abertos
• Fortalecer os mecanismos de formación e difusión dos modelos baseados en FLOSS e as súas vantaxes competitivas

Estas liñas estratéxicas plasman o compromiso do goberno galego cunhas políticas TIC sostibles e de calidade, garantes cos dereitos dos cidadáns e coas esixencias tecnolóxicas dos mesmos, rexidas polo principio reitor da cooperación, e dirixidas a modernizar Galicia.

A través de Plans de Acción FLOSS anuais establécense unha serie de actuacións e actividades dirixidas a acadar en Galicia un maior uso do FLOSS nos ámbitos da Administración Pública, da Cidadanía e da Empresa, mantendo a colaboración cos axentes FLOSS galegos así como co CENATIC, coa intención de xuntar esforzos e executar unha estratexia global e integradora de forma coordinada cos medios da Oficina de Coordinación FLOSS.

En definitiva pode considerarse que o verdadeiro valor estratéxico está en compartir todos os recursos necesarios para a reutilización eficiente do software e do coñecemento.