Servizos públicos dixitais: Emprego

Plan de modernización do servizo público de emprego de Galicia
En Galicia hai actualmente máis de 200.000 persoas inscritas no rexistro do paro en cincuenta e dúas oficinas que se reparten polo territorio galego. O Servizo Público de Emprego de Galicia estruturou un conxunto de medidas que buscan un maior achegamento coa poboación demandante de emprego e as empresas galegas e, ao mesmo tempo, que ese achegamento implique o menor impacto ambiental posible.

Deste xeito, para dar unha resposta a cidadanía eleborouse un plan integral de modernización do servizo público de emprego de Galicia, o cal ten como obxectivo básico configurar a intermediación como función primordial do servizo público de emprego. Outras accións de apoio incluídas no plan son a formación e o uso das tecnoloxías da información e das comunicacións.

Dende a consellería de Traballo e Benestar considérase que as oficinas de emprego da Xunta de Galicia (OEX) deben constituir o elemento principal na cadea da intermediación laboral por ser as unidades que entran directamente en contacto coa realidade do contorno no que están emprazadas.

De feito, a Consellería aposta polo incremento da intermediación a través da rede de oficinas de emprego así como por un novo modelo de xestión das demandas de emprego centrado nas propias oficinas, sen esquecer a aplicación e o desenvolvemento das novas tecnoloxías da información e das comunicacións as cales permitirán liberar recursos para a súa dedicación a outras actividades cos cidadáns.

En concreto, as actuacións que se están levando a cabo son: 

• Equipamento tecnolóxico nas oficinas de emprego
• Adecuación dos locais
• Eficacia na intermediación laboral
• A achega ecorresponsable das novas tecnoloxías no Servizo Público de Emprego de Galicia