Oficinas de información e rexistro

Sistema de quendas de usuarios

As oficinas de rexistro incorporaron en 2011 un sistema que permite organizar as quendas dos usuarios, minimizando o impacto das colas e optimizando todos os recursos de atención ó público dispoñibles. Este sistema implantouse no Rexistro Xeral de Vigo e Lugo, e no 2012 continuarase co resto de cidades.

O sistema de xestión de quendas e direccionamento de cidadáns, Quendas, integra os equipos e aplicacións informáticas necesarias para facilitar as seguintes funcionalidades:

• Identificación do cidadán
• Regulación de quendas
• Direccionamento aos postos de atención
• Visualización de mensaxes informativas
• Control e supervisión de todo o conxunto
• Obtención de estatísticas

Publicación de información do rexistro na Web
Dentro da páxina web institucional www.xunta.es publicouse a información de identificación das oficinas de rexistro e información:

Modelo de funcionamento. Actividades Realización e localización das oficinas de rexistro Modelos de documentos Preguntas mais frecuentes

Sistema de videointerpretación para persoas xordas
A Xunta de Galicia ten dispoñible un sistema de videointerpretación en lingua de signos que lle garante ás persoas xordas o acceso, en igualdade de condicións, ao 012, a liña telefónica que canaliza todas as consultas de información xeral que a cidadanía dirixe á Administración galega.

Emprego, vivenda, voluntariado, cuestións de interese para a mocidade, para as mulleres, para as persoas dependentes… desde solicitar un permiso de queima ata consultar un proceso selectivo ou unha lista de contratación.
Toda a información que pode solicitarse no 012 xa é accesible tamén para as persoas con discapacidade auditiva.

A prestación deste servizo por parte da Xunta de Galicia faise a través de BILDTEC, un sistema de videointerpretación simultánea desenvolvido pola Fundación Gátaca para facilitarlle a este colectivo a comunicación en Lingua de Signos Española (LSE) nas oficinas e sitios web de institucións públicas e en empresas con servizos de atención ao público.

A súa aplicación ao 012 é froito dun convenio asinado entre a Xunta de Galicia, e a Federación de Asociacións de Persoas Xordas de Galicia.

O servizo de videointerpretación da Xunta está dispoñible a través da rede e tamén, de xeito presencial, no Rexistro Xeral da Xunta en Santiago de Compostela e nas delegacións deste na Coruña, Lugo, Ourense, Pontevedra, Vigo e Ferrol.

Aquelas persoas que desexen contactar co 012 empregando BILDTEC na súa versión on-line necesitan unha cámara web e unha conexión a internet cunha velocidade de subida de, cando menos, 512 kpbs.

Unha vez que BILDTEC recibe a chamada dunha persoa xorda, un videointérprete solicitaralle os datos da consulta que esta desexa realizar.

Empregando unha liña paralela o/a videointérprete contactará co operador/a do 012 para indicarlle que se vai a establecer a comunicación.

A partir dese momento o/a videointérprete actuará de ponte entre a lingua de signos e a lingua oral, isto é, entre a persoa xorda e a persoa oínte.

Nos puntos de acceso presenciais os usuarios e usuarias terán á súa disposición unha pantalla táctil que facilita a comunicación entre a persoa usuaria e o persoal de atención do rexistro, e que se sitúan, cada unha delas, fronte ás dúas pantallas de fácil manexo que inclúe esta ferramenta.

Neste caso, a conversa entre as dúas persoas establecerase grazas a que o/a videointérprete de BILDTEC servirá de canle entre ambos/as.

Coa opción presencial, as persoas xordas non só poderán requirir a información que ofrece o 012, senón tamén calquera dos servizos que se prestan habitualmente na Oficina de Rexistro Único e Información da Xunta de Galicia, isto é: presentar solicitudes ou escritos, consultar procedementos administrativos (convocatorias de bolsas, subvencións, axudas, oposicións...), pedir orientación e información xeral, etc.