Modernización da Administración

O Diario Oficial de Galicia
Desde o pasado 2 de maio de 2011 a edición electrónica do Diario Oficial de Galicia que se publica na web da Xunta de Galicia substitúe á edición impresa en papel no carácter de oficial e auténtico, tal e como indica o Decreto 198/2010, do 2 de decembro, no seu artigo 13. Con carácter xeral, o DOG publícase diariamente de luns a venres, salvo os días declarados inhábiles no ámbito territorial da Comunidade Autónoma de Galicia.

Con este cambio deuse un paso máis no proceso de modernización da Administración autonómica e cúmprese cun dos obxectivos recollidos no decreto de Administración electrónica aprobado polo Goberno galego o pasado mes de decembro de 2010.

Vantaxes e Aforro
Desde a publicación do DOG dixital simplificáronse os procesos de produción, reducindo o tempo de edición, a racionalización do gasto e a difusión gratuíta do boletín.

Ademais, compre destacar que o formato electrónico do DOG:

• Reduce o impacto medioambiental, xa que elimina o consumo de papel e auga.
• Simplifica a maquetación, permitindo obter un aforro de tempo.
• Maior lexibilidade do texto, ao dispor dun PDF máis sinxelo.
• Facilita a subscrición a través do correo electrónico, permitindo seleccionar unicamente as seccións que interesen ao usuario, ou incluso dun rango determinado da publicación.

O documento do DOG
O artigo 12 do decreto 198/2010 confírelle carácter oficial e auténtico ao DOG, o que significa que o DOG electrónico posúe validez xurídica. Así, para garantir a autenticidade, integridade e inalterabilidade do contido do DOG, a edición electrónica incorpora a firma dixital avanzada por separado en cada unha das disposicións publicadas, o que permite asegurar a autenticidade dunha disposición concreta sen necesidade de descargar o diario completo.

Deste xeito, a sinatura dixital, presente soamente na versión PDF do DOG, é o elemento que lle outorga autenticidade, e polo tanto validez xurídica, dado que garante:

• A autenticación inequívoca, é dicir, que o asinante é quen di ser.
• A integridade do texto asinado, e deste xeito, a non modificación do mesmo.
• O non repudio, e polo tanto, a autoría do asinante.

O Código de Verificación Electrónica (CVE) consiste nun conxunto de carácteres que identifican de xeito único cada disposición, acto e anuncio publicado no DOG electrónico.

Calquera copia do DOG que conteña impreso o CVE correspondente terá a consideración de copia fidedigna.

O CVE permitirá cotexar calquera páxina dunha copia coa publicación orixinal, para o que so será preciso:

1. Acceder ao DOG electrónico.
2. Introducir o CVE que figura na copia para acceder directamente ao orixinal.
3. Cotexar a copia contra o orixinal obtido mediante o CVE.     

O sistema de sinatura utilizado polo DOG é PAdES (PDF Advanced Electronic Signatures).

O portal do DOG

O portal do novo DOG está deseñado como un espazo que articula todos os contidos relacionados co DOG, facilitando a súa consulta de xeito sinxelo, intuitivo e aberto a todos os cidadáns as 24 horas do día os 365 días do ano.

O Diario Oficial de Galicia é accesible desde:

O portal institucional da Xunta de Galicia: www.xunta.es Directamente no portal do DOG:http://dog.xunta.es

Co paso da publicación do DOG en formato dixital, o portal de consulta tivo en 2011 5,4 millóns de visitas.

O portal está articulado a través dunha páxina principal que contén accesos directos ás funcións principais e tres pestanas que agrupan os seguintes contidos:

Consulta do DOG: pódese consultar ou buscar calquera contido dentro do DOG. Tamén é posible escoitalo e descargar unha copia. Servizos do DOG: pódemos verificar o CVE, subscribirnos ao DOG ou publicar un anuncio calculando e pagando as correspondentes taxas. Axuda: información sobre a publicación de anuncios, a oficialidade e verificación do DOG, así como un resumo coas preguntas mais frecuentes.