Mar Pereira sitúa ás infraestruturas de telecomunicacións entre os motores principais para a modernización de galicia

A secretaria xeral de Modernización e Innovación Tecnolóxica, Mar Pereira, destacou a relevancia das infraestruturas de telecomunicacións como un dos motores principais para a modernización de Galicia. Así o asegurou durante a celebración hoxe en Santiago da XV Noite Galega das Telecomunicacións que organiza o Colexio e a Asociación de Enxeñeiros de Telecomunicación de Galicia (COETEG-AETEG), onde animou aos profesionais do sector a seguir traballando polo progreso da Comunidade no ámbito da sociedade da información.  

A responsable de novas tecnoloxías da Xunta indicou que Galicia atópase inmersa nun proceso de desenvolvemento no eido das telecomunicacións que o Goberno galego está a impulsar a través do Plan de Banda Larga 2010-2013 para universalizar o acceso a Internet de toda a sociedade galega.

Así, Mar Pereira fixo referencia aos avances acadados desde o lanzamento do Plan o pasado mes de febreiro, como o investimento nunha rede troncal de fibra de case 1.900 quilómetros, unha potente rede de telecomunicacións coa tecnoloxía máis avanzada en canto á capacidade de crecemento, calidade, posibilidades de evolución e maior velocidade de transporte. Deste xeito, a Xunta de Galicia, a través de Retegal xestionará unha infraestrutura que lle permitirá unha gran capilaridade para achegar á Rede as zonas máis illadas tecnoloxicamente que ata o de agora non podían acceder aos servizos dixitais máis avanzados.

A secretaria xeral incidiu na importancia da implantación destas redes de novas xeración para poder avanzar en novos servizos innovadores e diferenciais como os dispositivos no fogar, cuxa incentivación se inclúe na estratexia da Axenda Dixital de Galicia 2014.gal. Nesta liña, Mar Pereira indicou que se impulsará o fogar dixital “que amosa un novo concepto de habitabilidade e sustentabilidade que mellorará a calidade de vida nos fogares galegos no eido da eficiencia enerxética, da seguridade, da accesibilidade e incluso do lecer e do entretenemento.”

A previsión de penetración do fogar dixital a nivel mundial estímase nun 44% nun prazo de 3 anos, un dato, que segundo Mar Pereira, dá a medida da importancia e as oportunidade que pode supoñer para Galicia impulsar este tipo de iniciativas.  

Premiados

O Colexio Oficial  e a Asociación de Enxeñeiros de Telecomunicación de Galicia (COETG-AETG) entregaron os tradicionais Premios Galicia das Telecomunicacións 2010 entregaranse no marco da XV Noite Galega das Telecomunicacións e da Sociedade da Información, que se celebrou hoxe, coincidindo co Congreso FITCE, no Hostal dos Reis Católicos e que abordou a temática do Camiño de Santiago e as Telecomunicacións Europeas

O galardón de Enxeñeira do ano recaeu en Edita de Lorenzo, directora da Escola Técnica Superior de Enxeñeiros de Telecomunicación da Universidade de Vigo, distinción instituída polo Colexio que concede a enxeñeiros de telecomunicación destacados polo seu labor profesional.

Pola súa banda, Andrea Penza, presidente da Federación de Ingenieros de Telecomunicación da Comunidade Europea (FITCE), converteuse nesta edición da Noite en Socio de Honra da AETG, distinción do COETG e a AETG para premiar as personalidades destacadas no apoio e na promoción das telecomunicacións.

O Premio ao Mellor Proxecto TIC con Beneficios Sociais correspondeulle á empresa Bluemobility S.L. pola súa Rede intelixente de puntos de repostaxe para vehículos eléctricos (RIRVE); o proxecto OS-NETBACK, deseñado pola empresa Open Soft Servicios Informáticos S.L. recibiu o Premio INEO á Mellor Aplicación TIC; o Premio Ingeniero Gerardo García Campos á Mellor Iniciativa Empresarial TIC recaeu na empresa Eventyam Ingenieros, S.L. e o Premio Gradiant á Mellor Tese Doutoral aplicada ao sector TIC concédeselle a Rafael Asorey Cacheda polo innovador sistema de distribución de vídeo para redes sen fíos.